تەما، میدیای ڕاستی و شیكاری

بێمۆڕاڵی گەورەی سیاسی لە ڕۆژانی کۆڕۆنادا

12 Apr
کاروان مەهدی / 12.04.2020

بێمۆڕاڵی گەورەی سیاسی لە ڕۆژانی کۆڕۆنادا

 

یەکێتی بە نموونە لە کەیسی (مستەفا سەلیمی)دا

 

هەشت ڕۆژ پێش ئێستا، ئاسایشی یەکێتی، پەنابەری سیاسی (مستەفا سەلیمی) تەمەن پەنجاو سێ ساڵی ڕادەستی ئێران کردەوەو ئەمڕۆ لە زیندانی سەقز لە سێدارەدرا.

بەپێی بەیانننامە و سەرچاوەکانی میدیا مستەفا سەلیمی دوو هەفتە پێش ئێستا دوای ١٧ ساڵ زیندانی بە چەند تۆمەتێکی سیاسی و یاخیگەری لەگەڵ ژمارەیەک زیندانی دیکە لە بەندیخانەی سەقز ڕادەکات و دوای چەند ڕۆژێک خۆی دەگەیەنێتە هەرێمی کوردستان و لە سنوری پێنجوێن خۆی لە ماڵێکدا حەشار دەدات. دوای ئەوە هەر زوو ئاسایشی یەکێتی بەبیانووی کۆڕۆناو داخستنی سنورەوە ڕێگەی مانەوەی نەداو ڕادەستی ئێرانی کردەوە.

یەکێتی بەبیانووی کۆڕۆناو داخستنی سنورەوە ڕێگەی مانەوەی نەداو ڕادەستی ئێرانی کردەوە.

ئەم وتارە تاوتوێی ئەوە دەکات کە یەکێتی بۆ وەک هێزێکی سیاسی لە وەها کەیسێکدا پێشیلکارو تاوانبارە.

بەگوێرەی پێناسەو تەعریفە یاسایی و مەدەنییەکان و زۆر بە سادەیی کەیسی (مستەفا سەلیمی) کەیسی پەنابەرێکی سیاسی ڕووتە لە هەرێمی کوردستاندا. شوێنی جوگرافی ڕووداوەکەو دەسەڵاتدارێتی ناوچەکەو لایەنی ڕادەستکەر سەرنجمان دەخاتە سەر یەکێتی. جا لەسەر داوای ئێران یا بۆخۆشیرینکردنی زیاتر لای ئێران بێ ئاسایشی یەکێتی کە بە ناو دەزگایەکی حکومییەو بە کردەوە هێزێکی ئەمنی حزبییەو سەر بە یەکێتی نیشتمانییە ڕادەستی ئێرانی کردەوە. ئەم کەیسە کەم و زۆر پەیوەندی بە کۆڕۆناوە نییە، مایەی بێئاگایی و فریودانێکی گەورەشە ئەگەر وا لێکبدرێتەوە. یەکێتی بەم کارە هەر تاوانێکی ئینسانی و بێمۆڕالییەکی گەورەی نیشتیمانی ئەنجام نەداوە بەڵکو پێشێل و ژێرپێخستنی چوار ڕێککەوتننامەی جیهانی و ناوخۆیشی کردووە لەوانە:

-جاڕی گەردوونی مافەکانی مرۆڤ.

-ڕێککەوتننامەی مافە مەدەنی و سیاسییەکان.

-ڕێکەوتننامەی جنێڤ لەبارەی پەنابەرانەوە

-دەستوری عیراق

وڵاتانی ئەندام و ئمیزاکەری ئەو ڕێکەوتننامەیە گیانی هەر بێگانەیەک کە بەشێوەیەکی یاسایی یا نایاسایی هاتبێتە نێو سنورەکانی وڵاتانی ئەندامەوە بپارێزن

با لەوە بگەڕێین کە تا چ ئەندازەیەک مافەکانی مرۆڤ لە عیراقدا پێشێلکراوە بەڵام هەر بۆ بیرخستنەوە عیراق یەکێکە لەو وڵاتانەی ئیمزای هەر سێ ڕێککەوتننامەکەی سەرەوەی کردووەو پابەندبوونی خۆی پێیانەوە ڕاگەیاندووە بەوەی کە پێویستە “وڵاتانی ئەندام و ئمیزاکەری ئەو ڕێکەوتننامەیە گیانی هەر بێگانەیەک کە بەشێوەیەکی یاسایی یا نایاسایی هاتبێتە نێو سنورەکانی وڵاتانی ئەندامەوە بپارێزن.” ئەوەش ڕوونە کە هەرێمی کورستان تا ئەم ساتە هەرێمێکی فیدڕاڵە لە چوارچێوەی عیراقداو پێویستە پابەندبێ بە هەموو ئەو ڕێکەوتننامەو پابەندییە نێودەوڵەتییانەی کە عیراق واژۆی دەکات.

 

ئەگەر لە سۆنگەی بە تەنگەوەهاتنی مافەکانی مرۆڤ نەبێ، ئەڵمانیا لەم ڕۆژگاری کۆڕۆنایەدا چ کاری بەو گەنج و مێردمنداڵانە هەیە کە لە خوار ١٨ ساڵەوەن و لە تەلبەندەکانی سنوری تورکیاو یۆنان گیرییان خواردووەو چەند ڕۆژێک پێش ئێستا بەشێکی زۆریانی وەک پەنابەر قبوڵ کردن و بڕیاریدا ڕێکارو خەرجی گواستنەوەیانی لە یۆنانەوە بۆ ئەڵمانیا دەستپێبکات.

ئایا یەکێتی دەیتوانی لە وەها دزێوی و تاوانێک خۆی بپارێزێ؟

ئایا یەکێتی دەیتوانی لە وەها دزێوی و تاوانێک خۆی بپارێزێ، بە دڵنیاییەوە دەیتوانی، با گریمانەی ئەوە بکەین کە ئێران لە کەناڵێکی فەرمییەوە داوای ڕادەستکردنی مستەفا سەلیمی لە یەکێتی کردۆتەوە، بەڵام بە دەیان هۆکارو بیانوو و فێڵی یاسایی و سیاسی و دبلۆماسی یەکێتی دەیتوانی خۆی نەبان بکاو نەچێتە ژێر ڕکێفی وەها تەکلیفێکەوە، ئایا بە ڕادەستنەکردنی سەلیمی یەکێتی چ زیانێکی دەکرد؟ نە کۆماری ئیسلامی ئێران لەسەر زیندانییەکی هەڵاتوو کە بە قارەمانێتی و چەلەنگی خۆی دەربازکردووەو خۆی گەیاندۆتە هەرێم پەیوەندی لەگەڵ یەکێتی کە نزیکەی نیو سەدەیە دۆست و نزیکن تێکدەدات. نە یەکێتی بە ڕادەستکردنی سەلیمی ەوە لەلایەن ئێرانەوە شکۆدار دەبێ.

لە پشتی ڕووداوی (مستەفا سەلیمی)دا هەرچ پەیام و جەدەلێک لەنێوان ئێران و یەکێتییەوە ئاڵوگۆڕکرابێ، هیچ لەوە کەمناکاتەوە کە ڕادەستکردنی زیندانییەکی سیاسی حوکمدراو بە لە سێدارەدان بە کۆماری ئیسلامی ئێران ئاکام و چارەنووسەکەی لای یەکێتی ئاشکراو ڕوون بووە. بە هەمان ئەندازەش ئەوە ڕاستە کە یەکێتی بە پاراستنی ژیان و گیانی سەلیمی کێرڤی پاراستنی مافەکانی مرۆڤی لە هەرێم و قەڵەمڕەوی خۆیدا دەبردە ئاستێکی دیکەوەو بەو بەرگریکردنەش لە ماف و کەرامەتی پەنابەرێکی بێ پشتیوان لەم ڕۆژگارە درمییەدا دڵخۆشی دەکردین.

من تێگەیشتنم بۆ ئەوە هەیە کە پارتی لەگەڵ تورکیاو یەکێتی لەگەڵ ئێران لە پەیوەندییەکی ستراتیجی و ئەمنی بەهێزدان

من تێگەیشتنم بۆ ئەوە هەیە کە پارتی لەگەڵ تورکیاو یەکێتی لەگەڵ ئێران لە پەیوەندییەکی ستراتیجی و ئەمنی بەهێزدان بەڵام ئەمە هیچ بیانوو و پاساوێک ناداتە ئەو دوو هێزە کە کاری قێزەون و تاوانی گەورەی ئینسانی و نەتەوەیی ئەنجام بدەن، هێزێکیان شەڕی پەکەکەو ئەویدیکەیان پەنابەری سیاسی ڕادەست بکاتەوە. ینک و پدک خەریکە دەیکەنە نەریتێکی سیاسی و ئەوە بەسەر خەڵکی کورستاندا دەسەپێنن کە بۆئەوەی پەیوەندی دۆساتیەتیان لەگەڵ تورکیاو ئێران تێکنەچێ ئەوا ڕەوایەتی ئەو چەشنە تاوان و کارە قێزەونانەیان هەیە. هەروەک لە بەیاننامەکەی کۆمەڵەی زەحمەتکێشانی کوردستاندا هاتووە: ‘ڕادەستكردنەوەی ناوبراو لەلایەن هەر كەسێكەوە بێت، كارێكی ناڕەوایە كە نەریتی تا ئێستای ھەرێم بەرانبەر پەنابەران، بە تایبەتی كوردانی پەنابەر، پێشێل دەكات و دەبێتە ڕچەشكێنییەك بۆ نەریتێكی نەشیاو. ئەو كارە كاریگەریی نەرێنی لەسەر پێوەندی و ھاوپشتی خەڵكی ڕۆژھەڵات و باشور.’ ڕەنگە لەمەودوا ئاسان نەبێ زیندانییەکی سیاسی لە گرتوخانەکانی ئێران هەرێم وەک پەناگەی ئازادی خۆیان سەیرکەن و هیچی دیکە ئەو پەیامەی مستەفا سەلیمی ڕاست نەبێ کاتێک لە سنور دەربازی دەبێ و بۆ چالاکوانێکی مافی مرۆڤ لە ئێراندا دەینێرێ و دەڵێ:’ تەواو من ئازاد بووم’.

بەداخەوە لەوەها دۆخ و تاوانێکدا لێدوانی وتەبێژی حکومەتی هەرێم دووبارە ئەوەی سەلماندەوە کە ئەم هەرێمە لەلایەن دامودەزگای نیشتمانییەوە بەڕێوەناچی و لە دروشمدا بانگەشەی گەورەو لە کرداردا پارچەپارچەبوونێکی بیمار پیادە دەکەن.

کۆمێنتی خۆت بنووسە